Атир танлашни биласизми

• 

Подробности

Бўлим: Бекажон

Чиққан санаси: 01 Апрель 2013

(Нашр қилинган санаси)

Аёлларнинг пардоз воситалари орасида энг муҳими ва ёқимлиси, шубҳасиз, духилардир. Бу воситани ҳар аёл ўз табиатига, ёшига қараб танлагани маъқул. Улар хотин-қизларнинг кўркамлиги, назокати ва хушрўйлигини янада яхшилашга ёрдам беради.
Атирлар ҳидига кўра, икки гуруҳга бўлинади: биринчиси – битта гулнинг исини берувчи; иккинчиси – бир нечта гул ҳидини берувчи духилар (сирен атири, марваридгул атири, чиннигул ҳамда наргис атирлари ва бошқалар). Яна парфюмерларнинг фантазияси асосида тайёрланган атирлар ҳам бор. Духилар нафис ва ўткир ҳидли бўлиши мумкин. Булардан ташқари, турли парфюмер тўпламлари, атир ва одекалонлар ҳам ишлаб чиқарилади. Атирлар сифатига қараб «Экстра», А, Б, В гуруҳга бўлинади.
Атирнинг турғунлиги учиб кетганидан кейин ўзига хос ҳидини қанча муддат сақлашига қараб белгиланади. У асосан атирнинг парфюмерия таркибига боғлиқ. Б ва В гуруҳи атирларининг ҳиди пахта ипидан тайёрланган газламада камида 30 соат, А гуруҳидаги атирлар 40 соат, гул ҳидли «Экстра» гуруҳи атири 50 соат, фантазия асосида тайёрланган гуруҳ атирлари 60 соат сақланади.
Атир тўғридан-тўғри кийимга сепилса, доғ қолиши мумкин. Шунинг учун духи ҳўл юзга суртиб, рўмолча, қўлқопчага сепилади.
Атирни қуёш нуридан эҳтиётлаш керак. Кафолатли сақлаш муддати 12 ой. «Экстра» гуруҳи атири учун эса кафолатли сақлаш муддати 15 ой. Духи узоқроқ сақланса, ранги хира тортиб қолади ва бузилади. Айрим атирлар совуқда (5 даражадан паст ҳароратда) чўкма ҳосил қилади. Агар яна иссиққа (18-20 даража) қўйилса, чўкма йўқолиб, атир яна ўз ҳолига қайтади.

Зуҳра Ҳамдамова