Тиббий кўрик мажбурийми?

• 

Подробности

Бўлим: Саломатлик

Чиққан санаси: 31 Март 2013

(Нашр қилинган санаси)

Никоҳ — ҳар бир кишининг ҳаётидаги бахтли кунларидан бири. Аммо келин-куёвларнинг келажакда ҳам бахтли турмуш кечиришлари кўп жиҳатдан уларнинг саломатлигига боғлиқ. Никоҳдан ўтишда тиббий кўрикнинг жорий этилиши эса рўй бериши мумкин бўлган турли кўнгилсизликлар, туғиладиган болаларнинг ирсий ва туғма касалликларга чалиниш ҳолатларининг ҳам олдини олишда муҳимдир. Аммо айримларнинг беэътиборлиги ва жорий қилинган қоидаларга амал қилмаслиги оқибатида янги-янги оилаларнинг бузилиб кетаётганига дуч келяпмиз. Таҳририятимизга келган бир қанча мурожаатлардан сўнг шу мавзуга қўл урдик...

ТИББИЙ КЎРИК МАЖБУРИЙ
Яқинда тўйим бўлади. Олдиндан ФҲДЁга никоҳдан ўтиш учун ариза берганимизда тиббий кўрикдан ўтиш учун йўлланма беришди ва бунинг мажбурий эканлигини айтишди. Шу тўғрими?
Ш.Б. Қўқон шаҳри
“Никоҳланувчи шахсларни тиббий кўрикдан ўтказиш тўғрисида”ги Низомга асосан фуқаролигидан қатъи назар, ФҲДЁ органлари томонидан рўйхатдан ўтказиладиган барча никоҳларга тиббий кўрик жорий этилади. 50 ёшдан катталарнинг никоҳини рўйхатдан ўтказиш бундан мустасно. Улар учун тиббий кўрик фақат ўзларининг розилигига кўра ўтказилади.

ТАРТИБИ ҚАНДАЙ?
Тиббий кўрикдан ўтиш тартиби қандай бўлади? Ҳар бир киши ўзи истаган жойдаги тиббиёт муассасаларида кўрикдан ўтиши мумкинми?
А. Қодиров, Урганч
Кўрикдан ўтаётган ҳар бир одамга ўзи яшайдиган ҳудуддаги тиббиёт муассасасида алоҳида тиббиёт картаси юритилади. Унда тиббий кўрикдан ўтаётган одамнинг паспортидаги барча маълумотлар ва текшириш натижалари тўлиқ акс эттирилади.
Агар сиз олдиндан муайян бир тиббиёт муассасасига бириктирилган бўлсангиз, албатта мазкур муассасада кўрикдан ўтишингиз мумкин.

ТАКРОРАН ЎТИШ МУМКИНМИ?
Агар тиббий кўрик натижалари қониқтирмаса ёки унга шубҳа туғилса, такроран тиббий кўрикдан ўтиш мумкинми?
Б. Комилова, Тошкент шаҳри
Агар сиз ўзингиз яшайдиган туман ёки шаҳрингиздаги тиббиёт муассасасининг даволаш-маслаҳат комиссияси томонидан берилган хулосага рози бўлмасангиз, такроран тиббий кўрик вилоят ва республика тиббиёт муассасаларида ўтказилади.

ЎТКАЗИШ МУДДАТИ ҚАНЧА?
Айрим тиббиёт муассасаларида тиббий кўрикдан ўтиш жуда чўзилиб кетади. Тиббий кўрикдан ўтказиш муддати ҳақида маълумот берсангиз.
К. Алимов, Бухоро шаҳри
Тиббий кўрикдан ўтиш муддати никоҳланувчи шахслар тиббиёт муассасасига мурожаат қилган кундан бошлаб икки ҳафтадан ошмаслиги керак.

ХАРАЖАТИ-ЧИ?!
Никоҳланувчи шахсларни тиббий кўрикдан ўтказиш харажатлари қанча, бу пулни қайси томон тўлаши керак?
А. Очилова, Гулистон шаҳри
Никоҳланувчи шахсларни тиббий кўрикдан ўтказиш ФҲДЁ органи томонидан берилган йўлланма асосида ҳар бир тиббиёт муассасасида (уларнинг яшаш жойидаги психиатр врачлар, наркологлар, фтизиатрлар, тери-таносил касалликлари диспансерлари) бепул амалга оширилади.

“ЧЕТ ЭЛЛИККА ТУРМУШГА ЧИҚЯПМАН...”
Мен қўшни республикалик қариндошимизга турмушга чиқяпман. Чет эл фуқаролари билан никоҳланувчилар ҳам тиббий кўрикдан ўтишлари шартми?
С. Нодирова, Самарқанд вилояти
Ўзбекистон Республикаси фуқаролари билан никоҳланаётган чет эллик фуқаролар ва фуқаролиги бўлмаган шахслар ўзларининг вақтинча яшаш жойида тиббий кўрикдан ўтишлари шарт.

НАТИЖА ИЖОБИЙ БЎЛМАСА...
Агар никоҳдан ўтаётган шахсларнинг тиббий кўрик натижалари ижобий чиқмаса, қандай йўл тутилади?
А. Аҳмедов, Қарши шаҳри
Аввало ФҲДЁ органлари никоҳни қайд этишда никоҳланувчи шахсларнинг тиббий кўрикдан ўтганлиги ва уларнинг ушбу текшириш натижаларидан хабардорлигига ишонч ҳосил қилиши керак.
Никоҳланувчи шахслар эса никоҳ қайд этилгунга қадар иккинчи томонни тиббий текшириш натижаларидан хабардор қилиши шарт.
Агар уларнинг бирида дарҳол даволанишни талаб этадиган бирор бир касаллик аниқланган тақдирда, тегишли даволаш муассасасига йўналтирилади.

ҚАМОҚДАГИЛАР ТИББИЙ КЎРИКДАН ЎТКАЗИЛАДИМИ?
Озодликдан маҳрум этилганларни тиббий кўрикдан ўтказиш тартиби қандай бўлади?
Ш. Мамедов, Навоий вилояти
Уларни тиббий кўрикдан ўтказиш ишлари Ўзбекистон Республикаси Ички ишлар вазирлигининг тиббиёт муассасаларида ўтказилади.

“Никоҳланувчи шахсларни тиббий кўрикдан ўтказиш тўғрисида”ги Низом асосида
Сарвар САФАРОВ тайёрлади