Кечиккан ажал

• 

Подробности

Бўлим: Ота-она

Чиққан санаси: 02 Апрель 2013

(Нашр қилинган санаси)

 

 

 

(Ҳаёотий воқеа)

Бу воқеа шахсан менинг ҳаётимда юз берган. Мактабга ўқиб юрган кезларим эди. Эндигина еттинчи синфни битириб, саккизинчи синфга қадам қўйиш учун ёзги таътилга чиқган ёш бола эдим. Ёзнинг иссиқ кунларидан бирида ойим билан саккизинчи синфнинг дарслик китобларини сотиб олгани бозорга чиқдик. Бозор айландик, баъзи китобларни харид қилдик. Яна баъзи эҳтиёжлар билан бозор оралаётган эдик тўсатдан бошим айланиб, кўз олдим қоронғулашди. Мен йиқилиб тушмаслик учун ўтиришга ҳаракат қилдим. Аммо бунга улгурмай, ҳушдан кетиб йиқилдим. Бир лаҳза гуёки оламни зулмат қоплади. Сўнгра эса у келди. Ўзи барваста, улкан қоматли эди. У менга жуда яқин келганиданми ёки аслида ҳам ниҳоятда катталигиданми мен уни фақатгина белигача кўра олдим холос. Кўз олдимни асосан унинг кенг елкалари ва кўкраги қоплаган эди. Бош қисмини ҳам кўрдим, аммо орадан анча йиллар ўтгани сабабли ҳозир тасвирлаб бера олмайман. Лекин танаси қизил рангли, йирик тангачалар шаклидаги нималар биландир қоплангандек туюлди менга. Мен кўз олдимдаги бу тилсимот Азройил алайҳиссалом деб ўйладим. Бўлди, ҳаммаси томом! Сўнги манзилга етиб келдим! Энди орқага йўл йўқ! Ҳозир Азройил алайҳиссалом жонимни олади ва Тангри таолонинг ҳузурига йўл оламан. Оҳ! Афсуски бунга тайёр эмасман. Қанчалар кўп гуноҳларим бор. Бир марта дунёга келиб ҳаёт ўйинида ютқаздим! Эҳ, қанийди ҳозир Азройил алайҳиссаломнинг чангалидан қутилиб кета олишнинг бирор чораси бўлса. У мени жонимни суғириб олишига бир баҳя қолди-ку! Ташқи оламдан ҳам бирор товуш келмайди. Гуёки қулоғларим кар бўлиб қолгандек ҳеч нимани эшитмаяпман... Ана овоз эштилди! Бу қандай овоз экан? Кимнинг овози? Эътиборимни овоз келаётган томонга қаратишга ҳаракат қилдим. Ҳа, бу таниш овоз экан. Аллоҳга шукр ўлмабман. Бу менинг муштипар онаизоримнинг овозику! Онажонимнинг йиғи овозлари! Овоз илғаганим заҳоти кўз олдим ҳам ёришди. Мен дунёга – ҳаётга қайтдим! Роббим менга яна бир имкон берди. Меҳрибон онагинамнинг кўз ёшларига раҳм қилиб мен қулини ҳузурига чақиришни кечиктирди. Ўзига бандаликни адо қилишим ва Ўзининг розилигини топиш йўлида ҳаракатда бўлишим учун.

Ғиёсиддин Муҳаммад Юсуф